老广话事：粤语新闻·老广话事

　　新快报讯（记者任磊斌）禽日凌晨，好多中意睇波嘅广州人实唔使瞓喇，世界至TOP嘅欧洲联赛冠军杯决赛18号凌晨两点九做电视直播。记者同埋成班死党一齐睇波，发现因为呢场波，好多宵夜档生意兴隆。

　　巴斯隆拿（巴塞罗那）禽日登顶，啲阿仙奴（阿森纳）拥趸（球迷）梗係唔爽啦；但无论点，睇精彩嘅足球直播，几个老友一齐又叫又笑已经係好多广州后生仔生活嘅一部分。喺德政北一间酒楼，记者同几个老友就边食宵夜边讲波经，然后睇埋直播。死党壁垒分明，着晒正版波衫，力撑自己嘅心水球队。

　　场波直播嗰时，啲人一时嘈喧巴闭（吵吵闹闹），一时揸实（握紧）拳头，有时紧张到成个弹起，有时又嬲到咬牙切齿。两边拥趸仲互相柴台（拆台），场面认真墟撼（热闹）。

　　虽然禽日台风“珍珠”仲发紧威，落住阵雨，但越秀南、惠福路、西华路、文明路等宵夜旺地依然人头涌涌，睇波嘅后生仔占咗多数。

　　人民路一间大排档嘅老板同记者讲：“今晚有多少雨水，所以未算多人喇。欧联半决赛AC米兰对巴斯隆拿嗰阵仲犀利啊！”

　　世界杯下个月就嚟喇，除咗去酒吧劈酒（喝酒）睇波，离唔开食嘅广州人一定会“占领”各个宵夜旺地，话唔定会整出一个世界杯宵夜经济小高潮。