广州笔记
梁小丹
爸爸妈妈嗰辈人好多都已经系退休人士啦,好彩啲嘅已经凑紧孙仔孙女啦,差啲嘅都喺度筹备紧仔女嘅婚姻大事。佢哋嗰班同学兼老朋时不时聚头,畅谈退休新生活。
最近又倾起生仔生女嘅问题。有个伯伯话,生仔榕树头,生女上茶楼。意思系生仔要娶新抱,又要买屋供楼,摆酒俾礼金,辛辛苦苦储咗成世嘅积蓄,就咁用晒喺个仔嘅婚礼度,退休都冇钱去潇洒,只可以坐喺榕树头度吹吹水,捉下象棋咁,边似得啲生女嘅,礼金收几多几多个零,个女又俾家用喔,得闲冇事就可以上茶楼,生活乐得自在逍遥。
妈子就笑呢个伯伯,话佢哋而家先话生女好,当时唔知边个知道生咗仔就烧炮仗,边个明明攞咗汤去探老婆嘅,知道生咗女掉转头就走。嗰个伯伯知道我细个嘅一段故,就话都系阿陈(我妈)醒,当时冇卖女,而家过得几滋润!
讲到卖女好似好夸张咁,实情系咁嘅:
喺我出世嘅时候,成个产室就系得我一个女婴,我把声系喊得最尖最大声嘅,而且眼仔碌碌,好鬼精灵。当时瞓喺我妈子隔篱嘅产妇,系香港人,啱啱生完第二胎,又系仔。嗰个香港阿姨就同妈子讲,好钟意女,佢生咗两个都系仔,啱啱生呢个差啲攞佢命。佢话佢好钟意我,问我妈妈,可唔可以2万蚊让俾佢,佢保证令我衣食无忧,喺香港过富裕嘅生活。而且咁样嘅话,妈妈就可以再生多个,博个仔添!唔使惊计划生育。
喺当时,香港系超级有钱嘅地方,当时妈子系“八路军”,一日工资先8毫子,所以1986年嘅2万蚊系一个非常庞大嘅数字,保守估计相当于而家嘅一百万。
妈子听完香港阿姨嘅话,就话咁大件事要同老公商量下,佢自己话唔到事。后来,老窦听完之后,就话,生仔生女都系自己嘅细路,几钱都唔卖啊!
就系咁,我重系一名地道嘅广州女,喺一个普通嘅家庭中成长,但系我爸爸妈妈俾咗我好唔普通嘅爱,令我可以无忧无虑咁健康成长。冇佢哋,就冇今日嘅我,所以,无论如何,我都要努力令佢哋可以随时随地“上茶楼”。
我来说两句排行榜