 |
| |
带鸭蛋，派利是，食“太公饭”
新快报讯（记者 任磊斌）前日记者跟埋车陂苏东坡啲后人去拜太公，地点喺黄埔区嘅“将军地”，成百人搭住3部大巴去，场面都几壮观嘎。喺路上，苏氏嘅长老苏进泉伯伯同记者讲咗佢后生嗰时“拜山”嘅一啲习俗：要带只鸭蛋去拜啦、拜完有包分啦、有饭食啦。记者专登将零碎嘅嘢集埋，同大家分享吓，睇吓会唔会勾起你哋啲回忆。
“一只鸭蛋，一只烧猪，一箩包同几串团（粘米粉做嘅），蔗啦、冬菜啦、烧酒一壶、三旧（量词：块）猪肉、元宝蜡烛啦……用个担挑（扁担）担去。”74岁嘅泉伯口一路讲，手一路数。“点解系鸭蛋唔系鸡蛋呢？”记者问。泉伯话：“鸭乸（母鸭）多生仔啊嘛，唔知关唔关事，我地姓苏嘅子孙好似真係仔多过女啵。”
“大家轮流拜完，我地会揾人喺路口派利是，一人两蚊。呢个习俗解放前就有，以前派过国民党时期嘅金圆券、银圆券，法币都有过，改革开放之后，港币‘斗呤’都派过，啲细路就最开心喇。拜完祖先，现场啲包啊、团啊就手快有手慢无囖。”泉伯讲起细个时啲嘢好开心，“返到祠堂，当然有‘太公饭’食啦，係同姓嘅都可以嚟食嘎，太公分猪肉，人人有份啊嘛，好热闹嘎！”
唸落（想来）呢啲习俗，老广州去行清（扫墓）都系大同小异嘅，唔知各位街坊有无同感呢？图：23日，苏东坡后人在广州祭祖。新快报记者 王翔/摄
| |
|
精彩生活 
