活杀鸡毛菜

　　老婆到昆山小姊妹那里去白相，回来了的路上，打了只电话把我“今朝夜里厢请侬吃活杀鸡毛菜”。弄得我戆头戆脑还听勿懂是啥意思。只好等伊回来之后再讲。

　　等到伊回到屋里厢，看到伊浑身是东一块、西一块格烂泥，弄得像农民伯伯刚刚从田里厢出来一样，伊还要贼兮兮笑着讲“今朝阿拉让侬吃吃活杀鸡毛菜，活杀落苏，活杀草鸡，还有一只活杀南瓜”，啥门子加许多活杀，鸡毛菜就鸡毛菜，真勿晓得依哪能去活杀，我还没想好，伊就讲：“活杀格么，就是我自家到田里厢一样一样割下来，侬讲是勿是活杀格亚”。

　　原来这就是活杀。要晓得阿拉小辰光，屋里厢门口头就有自留地，春夏秋冬四季种各种各样小菜，伊格辰光想吃啥，自己到田里厢去割一点点就可以了，格大概就叫活杀，蛮有想象力格。

　　长了这么大只听到过活杀格鱼，活杀格鸡，活杀光牛等等活格么子。今朝听到伊讲活杀鸡毛菜倒是蛮新鲜，怪勿得现在城里厢格人，要到乡下去白相，原来伊拉阿是想吃活杀格鸡毛菜啊！