粤讲粤俗
微生亮
蟹，无论如何横行，逃不过文人饕客一支笔，拣蟹，煮蟹，食蟹，跟足指示，有法可依。蟹命好啲，高手可以将蟹壳拼返原形，仲有个空壳；再好啲，遇到苏学士咁嘅食客，就有丝竹助兴，美女送终。苏门弟子黄庭坚《谢何十三送蟹》：“形模虽入妇人笑，风味可解壮士颜。寒蒲束缚十六輩，己觉酒兴生江山。”寒蒲束缚，五花大绑，即系“扮蟹”嘅原意。
清朝末年，佛山南海有位“第尾才子”何淡如(1820-1913)，擅长“无情对”，堪称“对王之王”。最抵死嘅系，何淡如以粤语入诗，句句话都咁盏鬼。佢为打更棚写咗副对联：“老插到来总之扮蟹，少妇经过切莫炒虾。”贼仔行偷，经常要插人口袋，故得名“老插”。贼仔如果畀更夫捉住，捆螃蟹一样绑起来押到衙门，就叫“扮蟹”。所以“扮蟹”为捞家最忌。至于“炒虾”，往往与“拆蟹”并提，语义不文，不便深究，总之系叫更夫唔好喺女人面前讲粗口。
“扮蟹”究竟系点样变成今日“扮嘢”嘅意思，已经好难考证详细。有人话，撞到老插，小心衫袋，谓之“扮蟹”。咁就get唔到何淡如嘅point啦，下联明明叫更夫注意形象，上联有乜可能叫佢“船头惊鬼，船尾惊贼”，缩头缩颈，一啲职业操守都冇，连冇胆匪类都不如？据传慈禧太后有日想食蟹，御膳房太监一时揾唔到，就攞蛋黄扮蟹黄，做咗味“赛螃蟹”。好彩，老佛爷都钟意呢味“扮蟹”，过咗关。所以而家话人“扮蟹”，一般系讲佢诈傻扮懵搏同情。
“扮蟹”仲有一个意思，就系“扮大佬”，自作聪明扮有料。文人相轻，黄毓民不嬲睇唔惯陶杰，笑佢“扮晒鱼虾蟹”。但系，从来冇见过有人话自己系“蟹”，就连那位唔识广东话嘅评论员杨禹都冇，佢只不过画蛇添足。
歌词话晒：扮蟹濑嘢真正系滑稽。
我来说两句排行榜