新快报讯 (记者任磊斌王小明)禽日记者去番禺、南沙嗰边查访嗰粒(那颗)好得人惊(吓人)嘅“珍珠”(台风)对广州南部地区嘅影响。喺田间,记者同种蔗嘅农民伯伯倾计,除咗倾下点样防风抗灾,仲闲话家常,记者觉得农民伯伯真系社会上最知足常乐嘅人啊。 记者禽日中午十一点半左近嚟到番禺区大岗镇放马村田间。农民梁生两公婆同冯生两公婆围坐喺窝棚里面食紧饭。啲餸(菜)好简单:炒青菜,同埋节瓜焖猪肉。虽然话系“农民伯伯”,其实梁生同冯生佢哋四个都只係四十岁左右嘅老青年,但日晒雨淋,岁月嘅痕迹喺佢哋嘅皱纹啊、手脚啲枕(茧)、开裂嘅皮肤上面显晒出嚟。大岗镇政府嘅工作人员打开咗话题:“你哋今晚记得唔好喺呢道(这里)瞓(睡觉)喇,打风牙烟(危险)啊。”“我哋啲係黑皮蔗,蔗苗先半米高,一般好难吹断或者吹冧(吹倒)嘅。人就梗係返入村过夜啦,安全第一啊。”梁生冯生都咁话。话题深入咗,农民伯伯就开始同记者诉苦喇。“一年一造,啲蔗卖得好唔好要睇多唔多人嚟攞货!你哋城市人日日朝九晚五,我哋啊,晨早6点就係田里面做嘢喇……”梁生一路讲一路扒饭。“嚟,食餐冇餸饭。”冯生好热情咁招呼记者,“我哋平时落田做嘢,无水无电嘎,用柴煮饭,得闲嗰阵炒番两味、喋(喝)碗白酒,知足囖。你睇下,仲有部收音机,中午听下古仔(电台的故事连播),开开心心又一日喇。”
(金陵/编制) |