（小区停车位谁说了算）

　　昨日嘅广州日报话，近排（最近）发现好多私家车车主嘅烦心事又多佐一单：出门办事、购物，停车问题已经好茶煲（麻烦），点知返到屋企都冇得安乐，小区停车场畀小区餐馆或者小区外嘅小车霸占，搞到有啲业主要将车停係马路边，不单止（不但）担心畀人刮花或盗走，仲时不时要啃（吃）张“牛肉干”，交警罚一嚿水（100元），城管罚两嚿水（200元），一晚落来“停车费”认真（真的）贵。

　　话实（其实）广州小区业主这种烦恼确系普遍，就好似笔者所在大院，由于位于越秀老城区，大院内基本冇建停车场，好在大路够阔落（宽阔），新进驻嘅物管公司就将路嘅一侧划作停车位，照计（按说）咁样满足业主嘅停车要求绝对冇问题。但问题系，由于周边停车场少兼夹（而且）贵，好多附近嘅车主都将车停入大院，僧多粥少，大院车主如果係晚上十点之后返来，兜匀（转遍）成个大院都咪使旨意（别想）揾到车位。一开始，嗰啲唔系几好老脾（不是很好脾气）嘅业主都强烈抗议，但嘈（吵）餐饱都系没用，因为物管当面应承（答应）唔畀外面嘅车停入来，但系外面嘅车入佐来业主又点样去查证？你如果真系信物管嘅话，就畀人揾笨（骗）了，夜晚返迟佐车位全部停满晒，你即使系月保车都无晒符（没办法）。

　　有业主提出要为月保车固定车位，即使提高月保费都制（愿意），但物管就不肯照做，理由系提高月保费嘅话其他业主唔制（不干）。其实，我哋就系业主啊，我哋都制，有乜理由第啲（别的）业主唔制？小区业主停车难，系物管或开发商想赚钱造成嘅，呢个事实真系鸡食放光虫——人人都心知肚明啦。小区停车位到底边个话事？属于业主嘅公共设施，有乜理由畀物管去赚钱；开发商卖房赚到笑，有乜理由唔为业主提供必需嘅停车位？讲咁多都嗮气（没用），关键系业主要再多啲维权意识，团结起来，靠业委会去同物管和开发商交涉，咪再比人揾老衬（占便宜）啦！（兰叶）