新快报讯（记者　任磊斌）新一届嘅“西关小姐”竞选活动禽日开始接受报名，同上届一样，“新西关”嘅概念贯彻落嚟，无论係咪广州人，只要识听识讲少少广州话，对广州有感情嘅靓女都可以报名，而且仲分文唔收添。

　　记者禽日采访咗组委会秘书长邓先生，佢话，上届大约有差唔多600人报名，九成到九成五都係广州女仔。“今届我哋想突出‘新西关’呢个概念，想多啲热爱广州、喺广州住、喺广州读书、喺广州做嘢（工作）嘅外地女仔嚟参赛”。

　　邓先生仲同记者讲咗上届活动嘅一啲经验：“哪，好似旗袍咁，就好虾人（欺负人）喇，唔係个个女仔都着得好睇嘎。而且呢，旗袍质地同款式又好讲究，拣（挑）唔啱嘅话，仲衰过唔着啊。所以今届我哋特别会俾大啲空间参赛者自己拣衫搭配。”

　　邓生话：“总决赛嗰时，由得参赛者自己拣职业衣着、牛仔服饰、旗袍嚟展示中国现代女性美。而且每个组别当中都可以自己搭配同制作自己出场见人嗰套衫，自由发挥啰。”